كَومـــي يعــــوره هلهلــــــي : شعر عامّي .: بقلم الشاعر ((( ابو منتظر السماوي )))

<><> كَومـــي يعــــوره هلهلــــــي <><>
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

حيف وحرامات اليحب ما يلكَه كَلــب إحنَيِّــنْ
بالميَّه لو واحد لِكَــــــــه باللحيـه يبدي إيْزَيِّـنْ
مثـل العضو بالبرلمان اسْتَوَّه جَـــــــنْ مِتعَيِّـنْ
بالناس يِلعَبْ جَقلبـــــــــي ويدِّعي أنْ مَتدَيِّنْ
:::::::::: كَومي يَعوره هلهلــــــــــــــي وطشّيلنه وَهلِيَـــــــــه

حيف وحرامات الوكِـتْ سَوّانه مَلعَبْ طوبـــهْ
حَنتوش يِقره بالعَكِس وِقرايتَـــه مَكَلوبـــــــهْ
عضوَه أصبَحَتْ أمْ البَخَتْ جانَتْ كَبل حبوبـه
إعجَيِّزْ ولا سِنْ بالحَلِكَ وتكَول أنا مَخطوبـــه
:::::::::: كَومي يَعوره هلهلــــــي خَلْ تفرَح الحَجِيــــــــــــهْ

حيف وحرامات الدهــــر جابلنه هالناس أجنابْ
بيها التِفَرْهِدْ كلْ وَكِتْ , بيها التِكَِصْ بينه اركَابْ
ما طَلَعْ فَدْ واحِد شَهِمْ , لا طَلَعْ واحدْ حَبّــــابْ
كَولولنه شنهو شَكو , بينولنـــــه شو الأسبابْ
كَومي يَعوره هلهلــــــــــــــي خَلْ نِحسِبْ الخَرجِيَّــــــــــــــــهْ

حيف وحرامات وأسَفْ هالبَلَدْ صايِر طشّــــــارْ
سَوّونه إلهُمْ كالجِسِرْ , عالجثثْ سَوَّو مُعبــــــارْ
إبكلْ صوبْ تِلْكَه نايِحَهْ , دَخلَك يَلاهـي السَتّارْ
أيتامْ ما إلها عَددْ وِمْكَتِّلهْ ازغارْ اكبـــــــــــــــارْ
:::::::::: كَومي يَعوره هَلهلــــــــــــي سلطتنه أمريكيّـــــــهْ

حيــــف وحرامــات وأسَفْ رَيِّـــس بَلَدنــه الكـردي
ثارات يطلب مِـــنْ كَبــلْ ياخذ حصصهُـمْ نَــــقدي
شجابْ المصَخَّمْ وِشأَخَذْ وِشمنطي شو شِمْوَدّي
يِتنومس بقاط وفلـــلْ وأتنومَسْ آنَــه بجــــــــردي
:::::::::: كَومي يَعورَه هَلهِلـــــــــــــي أربيل هوليريَّــــــــهْ

حيف وحرامات الفُكَرْ تِلكَاه عايِشْ عِــــــــندي
يِشرَبْ وياكلْ لَبلَبي ليلَه ونَهاره إيجَـــــــــــدّي
شيصيرْ لو عِدنَه حُكمْ خَواجَه واحِد هِنــــــدي
أشرَفْ وأنظَف مِن (.) هَمْ حِرْمي هَمْ سيبَندي
:::::::::: كَومي يَعورَه هَلهِلـــــــــــــي شوفي الفُكَر تالِيّــــــهْ

حيف وحرامات الصَبرْ مَرْعَــدْ أفّادي وجَبدي
ما فادْ داء السُكَّري لا الخابطْ ولا السِنـــــــدي
بالهور تالي أنْطحلْ والسِبلِتْ من البَــــــــردي
إبهالحاله نِبقَه مَرْعِنَه حتّى ظهور المَهــــــدي
:::::::::: كَومي يَعورَه هَلهِلـــــــــــــــــي إنفوج ونِصَلْ جاليَّهْ

كَومي يَعوره هلهلي ونركَصْ سوَه جوبيـــــــهْ
شِلنَنه بضياء الكهْرَبَه عِدْنه الضوَه الكَمْريّـــهْ
إبنُصْ الشَهَرْ يضْوي الكَمرْ بِسنينَّه الهجريــهْ
ونِتبَرَّدْ بوكت الظهرْ بلا مروحه سَقفيّـــــــــهْ
:::::::::: كَومي يَعوره هَلهِلــــــــــــــي ونفطر على الجِرّيّهْ

كَومي يَعوره هَلهِلي وخَلّي يِرِنْ خِلخالــــــــجْ
لو بيدج إنتِ هَالهوه إكَطعتي هوَه بيخالــــــجْ
جِنَّه إخيوَه بهالوطنْ إتغَيرتي شنهو شِمالـــــجْ
جي لَعَبْ وَكتي إبحالتي إتغَيَّرَتْ كلْ أحوالِجْ
:::::::::: كَومي يَعوره هَلهِلــــــــــــي وَكتي إنخمَـــدْ طاريَّهْ

كَومي يَعوره هَلهِلي إبهَلهولتج صِكِّي الجـــــارْ
بالدارْ بَسْ الكاولي ما خَلَّه بالدار احجـــــــــارْ
شِمّات بالديرَه إلي كَعَيدي وحَرامي وعَيّــــارْ
وعيونهمْ ما تمتلي إلا بِتراب الحَفّـــــــــــــارْ
:::::::::: كَومي يَعوره هَلهِـلــــــــــــي فَرهود طاحَوْ بِيَّــــــه

لا إخوَه عندي ولا عَمْ , لا خالْ أتْنَخّاهُـــــــمْ
عكَربه صَفرَه آنه اخوِتي ريت الكَبرْ يِلفاهُـمْ
وأعمامْ أصْلاً ما شِفِتْ ما عندي حظ وياهُــمْ
وأخوالي كلْ واحد كَبرْ إنطاهُمْ الربْ وأخْذاهُمْ
:::::::::: كَومي يَعوره هَلهِلــــــــــي خَلْ تِسلَمْ الخاجِيّـــــــه

كَومي يَعوره هَلهلي مَستور ْ بالطاكَيّــــــــهْ
طاكَيتي وارثها ورثْ امن اجدادي العبيديّه
ما فادْ كلشي ما نِفَعْ صحنه شكثرْ سِلميّــــه
طغيان راكبهم جَهَلْ وأحلامهُمْ وَردِيّــــــــه
:::::::::: كَومي يَعورَه هَلهِلــــــــي الدنيه تَرَه مَكَضيَّـــــــه

((( ابو منتظر السماوي )))