* وردة علوردة أحط *: باللهجة العراقية : شعر / عبد اللّه عبّاس خضيّر

***** وردة علوردة أحط *****

شعر / عبد اللّه عبّاس خضيّر

ورده علورده أَحطْ
واهديها بالعيد الكْ

ولو ردتْ منّي الگلبْ
ما اخلي انه بخاطركْ

محروم كل العمرْ
مشتاگ ومناطرَكْ

مسكين هذا الگلبْ
عصفور طاح بشَرَكْ

بلچي بتوالي العمرْ
يلگاك ويعاشِرَكْ

ولو واصلتْ يا حلو ْ
يگولون عنّي هِلكْ

مثل الجمل ما شكى
وللمنخل اهوه وبركْ

مجروح جرح الوطنْ
من دار بيهْ الفلَكْ

وجروحنه توالمَنْ
وبدمّي دمّه نسِفَكْ

يا عيدْ ريث الجِدَمْ
خلْ دمعتي تبللكْ

يا عيد عندي عَتَبْ
أحچي الإلي والإلَكْ

لذبحي تناخَوْ هَلِيْ
وكلهمْ بدمّي اشترَكْ

وآنه دَمِي لكل هليْ
وكْ يا دمِيْ ناذِرَكْ