مساراتي ....
سلسة جديدة من الحكايات و الأحداث الواقعية و الخيالية التي تحدث معي أدونها بقلمي ...
في بعض الأحيان تأخذني اقدامي الى أماكن لم أتخيل يوماً بأني سوف أذهب لها اسمع و أشاهد قصص و أحداث كثيرة منها المفرح و منها المحزن .
حكايتي أليوم بعنوان
مساراتي الخذلان_مـن_الخلان بطلة الحكاية أمرآة عجوز تحكي و تقول عن خذلانها من قبل ولدها . و تبدأ الحكاية في احدى زياراتي الى دار المسنين القريب من منزلي التقيت بأمرآة عجوز تجلس لوحدها و الحزن يملئ مكانها سلمت عليها بتردد إجاباتي بحزن (هلأ يمة) و بعد سؤالي عن صحتها قلتُ لها لماذا انتي حزينة هكذا ؟؟ قالتي (يمه حجي و شكول و همومي جثيره) قلتُ لها احجيلي قصتج لا تضلين كاتمة همومج شاركية وية غيريج ترتاح نفسيتج . و تبدأ بسرد حكايتها تقول العجوز ..... - يمه انة وصغير تزوجت و على بيت زوجي رحت مدللة وياه احلئ عيشة عشت بس الله و حكمته ما رزقني بالطفل . - وية ابو بيتي سولفت يا تاج راسي كلت تزوج و انة اخطبلك التجيبلك الولد . - دمعت عيونة و كالي نعمة الله انتي اتعافيه عليج اخاف تطيرين مني و أبقى بطرك روحي ما اريد الولد اريدج انتي . - و إجه ذاك اليوم الجنت انتظره و حامل انة صرت رحت لأبو بيتي و كلت يا رجال انة حبلت فرح وياه فرحت و الگاع ما شايلتنة . - يا رجال كالت ربي الرزق هاجر بإسماعيل و هي عجوز رزقني و انة عجوز . حمدنه الله و شكرنا . - و عل كبر جاني الولد آيه من الجمال نايم بالمهد . - و مات ابو الولد و بقيت بطرك الولد نذرت روحي آلة و كبرته و وياه كبرت . - كاعدة بحجرتي جاني يمة كلي اريد أتزوج سمعت منه و دمعت عيوني من الفرح - جاوبته يمه هنيال عيوني راح تشوف هذا اليوم و هنيال رجلية الراح تفتر بالبيوت ادولك علئ بنت الحلال . - كلي يمه بنت الحلال موجودة وياي بنية بالدوام . - جاوبته يمه دام انته تحبه گليبي بالنص أكصنة نص باسمك و نص بأسمه . - و رحت و شـفـتـه بنت الحلال مزيونة و خطبته و صار العرس امشي وراهم و أصيح (هذا ابني الحلو طوله عريس ليوم هلهلولة هاي مرت ابني الحلو طوله عروسه اليوم هلهلوله) . - و إجت لبيتي مثل بنتي عاملته تركته هي تؤمر و هي تنهي . - بس هواي مرمرتني و عذاب اسود شوفتني انة المدللة بيت اهلي جنت و عند ابو بيتي أميرة عشت و وية ابني مرتاحة جنت هسه تجي مرت أبني تذلني ليش يا وكت هيج تخذلني . - و لخاطر وليدي تحملت عذاب هواي شفت بگلبي انة يأمه كتمت . لحد ما إجه ذاك اليوم الماجنت حاسبة حسابة راحت ظالمة البخت لابني و حجت أمك ما أريده منه تعبت . كله أمي هاي وين اوديه ما عدّه غير مكان بس بيتي إلباسمه . سمعته تكول ليش هذا البنت باسم أمك كله اي باسم أمي سكتت بــــــــــس طلعت غلطانة و مكيدة سوتلي و انة غفلانة بعقل ابني وسوست مثل الشيطانة و خلته على أوراق يبصمني و انة غفلانة لان ما اعرف اقرأ و أكتب انة بصمت بابني آمنت بــــــــــس طلعت أوراق تنازل عن البيت باسم ابني صار ما زعلت لان هذا بيته بــــــــــس زعلت لان و انة عايشة ورثني و سكتت . و مره ثانية سمعت مرتة بعلو الصوت تكله أمك ما أريده منه تعبت . - جاوبه أمي هاي وين اوديه كلته لدار العجزة وديه تعارك ويها و من البيت طلع . - جتني عاركتني و كالت ارتاحيتي ويه زوجي تعاركت و من البيت طلع بسبتج . - كلته بنيتي انه بشنو آذيتج حتى مني تعبتي كالت بيتي ما اريد احد يشاركني بي . - جاوبته يمه انه مثل امج تقبلين واحد هيج يسوي بأمج ضاجت و عليه صاحت اوووووف منج انه تعبت ما اريدج بيتي هي كوى . راحت و عافتني انه و دموعي على خدي و كلت ويه روحي لا ابني ما يرضى يبتعد عني . رجع للبيت ابني لحجرته دخل مرتة لحكته الله يعلم شنو براسه قرت بس اكيد مثل الشيطانة وسوست . ثاني يوم جاني انبي و كال يمه راح اوديج لدار العجزة هناك ترتاحين ستغريت و كلتله يمه هذا بيتي مرتاحة بي جاوبني يمه بــــــــــس مرتي ما تريدج . سكتت و ما حجيت شي لان ادري الحجي بعد ما يفيد كلتله يمه التشوفة يرضيك سوي بس كلي حتى الملم هدومي . راح بعد يومين إجاني كال يمه حظري روحج كمت الملم هدومي و مرتة بالباب واكفه تبارع بيني و بين نفسي اكول بلكت كلبه عليه رف و ما تخلي ابني لدار العجزة يأخذني و من طلعت ذهباتي راحت لانبي و براسة قرت جاني كلي يمه جيبي ذهبج خلي يمه هناك خاف يبوكونة عرفت ثاريه جانت تنتظر اطلع ذهبي كلته يمه اخذه ما يغلة عليك و لميت هدومي و أخذني لدار العجزة جابني و من ثلاث شهور لا شـفـتـه و لا شافني .......... إنتهت و قالت هي هاي قصتي يا يمه و الدموع تملئ عيناها . و انا كنتُ أستمع الى قصتها و الدموع تنزل من عيناي بـلا شعور قلتُ لها لا تحزني فغداً سوف يندم و يعود و يأخذك من هنا قالت (يمه بعد ما يندم وليدي ما يندم لحد ما اموت عود نوب يندم هاي اذا درى بيه من اموت) ... حزنتُ و ذهبت الى قسم معلومات المسنين و طلبت من صديقي تفاصيل العجوز رقم ولدها و عنوان منزله لم يوافق على مساعدتي و قال (هذه أسرار المقيمين هنا لا يحق الي بتسريبها لأحد) قلتُ له ساعدني عسا و لعل نحن قلب ابنها عليها و بعد إلحاح مني وافق و أعطاني الرقم و العنوان اتصلت به كأن الرقم مغلق فذهبتُ الى العنوان لكن لم اجد الشخص المطلوب لانه باع منزله و بعد محاولاتي بالبحث علمتُ انه قد ترك البلاد تارك ورائه أمه في دار المسنين .
هكذا كانت اول حكاية من سلسلة #مساراتي حكاية حزينة و يوجد امثالها المئات من هذا النوع .
ففي هذا الزمان زمان الانفتاح و التطور و التحظر تخلى الكثير من الناس عن وجدانهم و أصبحت قلوبهم قاسيه على اقرب الناس لهم . و الله و اعلم ماذا يخبئ الزمان .
___________________________________
سلسلة_قصص_مساراتي بقلم الـكـاتـب عبدالله_ماهر_الغانم الجمعة ٢٤ شوال ١٤٣٧هـ ٢٩ تموز ٢٠١٦م  |
ليست هناك تعليقات:
إرسال تعليق